نتن یاہو کے گھر تک رسائی مقاومت کی طاقت کا ثبوت ہے، شیخ نعیم قاسم
حزب اللہ لبنان کے سیکریٹری جنرل شیخ نعیم قاسم نے شہداء مقاومت سید حسن نصر اللہ اور سید ہاشم صفی الدین کی تدفین میں عوام کی بے مثال شرکت کو مزاحمت کی طاقت اور ایمان کا اظہار قرار دیا ہے۔ تشییع کے دوران عوام کا جوش و جذبہ اس بات کا ثبوت تھا کہ لبنان کے عوام اپنے رہنماؤں کے ساتھ کھڑے ہیں اور ان کا ایمان کبھی کمزور نہیں ہوگا۔
انہوں نے اس بات پر زور دیا کہ یہ تشییع حزب اللہ کے عقیدے اور ایمان کی فتح کا اعلان تھی۔ لوگ شہادت کی آرزو رکھتے ہیں اور کوئی بھی ان کو شکست نہیں دے سکتا۔
شیخ نعیم قاسم نے عراق اور ایران کے عوام کی حمایت کا بھی شکریہ ادا کیا، جنہوں نے لبنان کی حمایت کا اعلان کیا اور تدفین کی تقریب میں بھرپور شرکت کی۔
انہوں نے مزید کہا کہ سید حسن نصر اللہ کی شہادت کے بعد پارٹی کی قیادت نے حالات کو سنبھالنے میں کامیابی حاصل کی۔ ہم نے 10 دن کے اندر دشمن کے حملے کو پسپا کردیا اور صورتحال کو قابو میں لے لیا۔ حزب اللہ کی جڑیں مضبوط ہیں اور ہم اپنی طاقت کو مزید مستحکم کرنے کے لیے مسلسل محنت کررہے ہیں۔
انہوں نے کہا کہ مقاومت کی طاقت کا اظہار اس وقت ہوا جب مجاہدین نے اسرائیلی وزیر اعظم نتن یاہو کے گھر کو نشانہ بنایا۔
